Ambasadori slloven në Shqipëri, z. Peter Japelj, nënvizoi rëndësinë e Konsullatës në Durrës dhe rolin e saj në forcimin e lidhjeve më të thella mes dy vendeve. “Nuk kam asnjë dyshim se puna e Konsullit dhe Konsullatës do të kontribuojë në thellimin e marrëdhënieve tashmë të shkëlqyera dhe miqësore mes Sllovenisë dhe Shqipërisë”, tha ai. Konsulli i Nderit Genci Likoskëndaj u shpreh i kënaqur me hapjen e konsullatës në Durrës duke e cilësuar si një hap të rëndësishëm drejt forcimit të marrëdhënieve mes Sllovenisë dhe Shqipërisë.

Në ceremoni mori pjesë edhe nënkryetari i Bashkisë së Durrësit, z. Elio Jani, i cili vlerësoi hapjen e Konsullatës së Nderit, duke e parë atë si një shtysë për rritjen e mëtejshme të turizmit në Durrës. Konsullata do të shërbejë si një urë e rëndësishme ndërmjet Shqipërisë dhe Sllovenisë, si dhe do të lehtësojë shkëmbimet e ndërsjella në fusha të ndryshme. Dyert e saj do të jenë të hapura për të mbështetur shkëmbimet tregtare, për të përmirësuar marrëdhëniet ekonomike, si edhe për të promovuar bashkëpunimin kulturor midis dy kombeve.